बजारमा ग्यास छैन, सरकार कहाँ छ ? : एमाले

काठमाडौँ - विपक्षी दल नेकपा (एमाले) ले प्रधानमन्त्री बालेन्द्र शाहले राष्ट्रका नाममा दिने सम्बोधन सरकारी सञ्चार माध्यमभन्दा बढी निजी फेसबुक पेज र मनिटाइजेसनमा केन्द्रित भएको भन्दै आपत्ति जनाएको छ ।  प्रतिनिधि सभाको सोमबारको बैठकमा सचेतक निता घतानीले प्रविधिको प्रयोग राम्रो भए पनि राज्यका आधिकारिक निकायलाई बाइपास गरेर फेसबुकको भ्युज बढाउने खेलमा प्रधानमन्त्री लाग्नु दुःखद भएको बताइन् । 

सांसद घतानीले प्रधानमन्त्रीले संसद्को रोस्टमबाटै नेपालले पनि भारतको सीमा मिचेको आशयको अभिव्यक्ति दिएको भन्दै त्यसको प्रतिवाद गरिन् । ‘कुन तथ्य, प्रमाण र कूटनीतिक आधारमा प्रधानमन्त्रीले यस्तो संवेदनशील विषयमा बोल्नुभयो ? ’उनले भनिन्, ‘सत्ता र सरकार अस्थायी हुन्, तर भूगोल र सार्वभौमसत्ता स्थायी हुन्छ । आफ्नो देशको अस्मितामाथि प्रश्न उठाउने अभिव्यक्ति तत्काल संसद्को रेकर्डबाट हटाइनुपर्छ र प्रधानमन्त्रीले यसमा माफी माग्नुपर्छ ।’

देशका विभिन्न वर्ग र समुदायले भोगिरहेको समस्याबारे सरकार बेखबर रहेको उनको आरोप थियो । सांसद घतानीले सहकारी पीडितहरू आफ्नो बचत फिर्ताको पर्खाइमा रहेको र सुकुम्वासीहरू बासको चिन्तामा रहेको तर सरकारले कुनै ठोस कदम नचालेको बताइन् । 

किसानले समयमा मल र उत्पादनको उचित मूल्य नपाएको, गरिब नागरिकले उपचार नपाएर अकालमा ज्यान गुमाइरहँदा बन्द भएको स्वास्थ्य बीमा कार्यक्रमलाई प्रभावकारी बनाउन सरकार असफल भएको, बजारमा ग्यासको अभाव र महङ्गीले सीमा नाघेको बताइन् । उनले भनिन्, ‘बजारमा ग्यास छैन, तर सरकार कहाँ छ ?’  

राहदानी (पासपोर्ट), लाइसेन्स र अस्पतालमा नागरिकहरूले अझै पनि कालो लाइनमा बस्नुपर्ने बाध्यता रहेको उनको भनाइ थियो । 

पछिल्लो समय सिंहदरबारको नाम फेर्नुपर्ने भनी भइरहेको बहसप्रति पनि उनले टिप्पणी गरिन् ।