भोटेकोशीका बाढीपीडितको उद्धारमा काभ्रे कांग्रेस: जुटायो ११ लाख रुपैयाँ

काभ्रे - भोटेकोशी नदीमा आएको विनाशकारी बाढीबाट प्रभावित भएका नागरिकहरूको राहत, उद्धार तथा पुनस्थापनाका लागि नेपाली कांग्रेस काभ्रेपलाञ्चोक जिल्ला समितिले रु. ११ लाख आर्थिक सहायता जुटाएको छ ।

गत भदौ १० गते भोटेकोशीमा आएको भीषण बाढीका कारण रसुवा, नुवाकोट र धादिङ लगायतका क्षेत्रहरूमा व्यापक मानवीय क्षति हुनुका साथै ठूलो मात्रामा भौतिक संरचनाहरू ध्वस्त भएका थिए ।

सोही प्राकृतिक विपत्तिबाट पिल्सिएका छिमेकी जिल्लाका बाढीपीडितहरूलाई तत्काल सहायता पुर्‍याउने उद्देश्यले काभ्रे कांग्रेसले यो राहत अभियान सञ्चालन गरेको हो।

मानवीय सेवाका लागि संकलन गरिएको उक्त रकम नेपाली कांग्रेसको केन्द्रीय विपद् व्यवस्थापन कोषमार्फत पारदर्शी रूपमा सम्बन्धित बाढी प्रभावित क्षेत्र र आधिकारिक निकायहरूमा पठाइनेछ ।

नेपाली कांग्रेस काभ्रेका सभापति तीर्थ लामाका अनुसार विपद्को यस कठिन घडीमा पीडित नागरिकहरूको दुःखमा मलम लगाउनु, उद्धार कार्यमा हातेमालो गर्नु र मानवीय सहयोग जुटाउनु समाजका सबै वर्ग तथा राजनीतिक दलहरूको साझा दायित्व हो ।

बाढीपीडितहरूलाई थप सहयोग पुर्‍याउनका लागि काभ्रे कांग्रेसले सोमबारसम्म आर्थिक संकलन अभियान निरन्तर जारी रहने जनाएको छ । उता, सरकारी निकायहरूले भने बाढीका कारण भएका कुल जनधनको क्षतिको विवरण संकलन, मूल्यांकन तथा अभिलेखीकरणको कामलाई तीव्रता दिएका छन् ।