काठमाण्डौ – श्रीलंकामा संसारकै ठूलो नीलम भेटिएको छ । पाँच सय दश किलो तौल भएको बहुमूल्य रत्न नीलम भेटिएको बीबीसीले जनाएको छ ।

बिबिसीका अनुसार रत्नहरू प्रशस्त पाइने श्रीलंकाको रत्नपुरा क्षेत्रमा केही कामदारले इनार खन्दा उक्त नीलमणि फेला पारेका हुन् । एक जना रत्न व्यापारीले आफ्नो घरको छेउमा इनार खन्न लगाएका थिए ।

कोरोनाको बेला श्रीलंकाको रत्न बजार ओरालो लागेको बेला यति ठूलो मात्रामा नीलम भेटिएपछि यसलाई भाग्यले जुराएको भनिएको हो ।श्रीलंकाका अधिकारीहरूले संसारकै सबैभन्दा ठूलो नीलमणि आफ्नो देशमा फेला परेको समेत दाबी गरेको छ । विज्ञहरूले ५१० किलोग्रामको उक्त नीलमणिको अन्तर्राष्ट्रिय बजार मूल्य अहिले १० करोड डलर (११ अर्ब ८८ करोड रुपैयाँ) रहेको बताएका छन् ।

‘इनार खनिरहेको मान्छेले मलाई अनौठा ढुंगाहरू भेटिएको भनेर जानकारी गराएका थिए, पछि त यति ठूलो नीलमणि भेटियो,’ गामागे नाम गरेका ती रत्न व्यापारीले भने। सुरक्षाका कारण उनले आफ्नो पूरा नाम बताउन चाहेनन् । गामागेको परिवार तीन पुस्तादेखि रत्न व्यापार गरिरहेको छ ।

ठूलो ढुंगो भेटिएपछि उनले यो नीलमणि हो कि होइन भनेर जाँच्न अधिकारीहरूलाई खबर गरेका थिए ।  त्यसमा लागेको हिलो र अन्य कुरा हटाएर त्यसलाई शुद्ध नीलमणि प्रमाणित गर्न झन्डै एक वर्ष लागेको थियो । रत्नपुरामा अरू प्रकारमा बहुमूल्य रत्न पनि पाइन्छन्। श्रीलंका अन्तर्राष्ट्रिय बजारमा रत्न निर्यात गर्ने प्रमुख मुलुक हो ।

गत वर्षमात्रै श्रीलंकाले रत्न बेचेर झन्डै आधा अर्ब अमेरिकी डलर कमाएको थियो । अहिले भेटिएको नीलमणि ४० करोड वर्ष पहिले बनेको हुनसक्ने विज्ञहरूको भनाइ छ । ‘मैले यति ठूलो नीलमणि यसअघि कहिल्यै देखेको थिइनँ। यो लगभग ४० करोड वर्ष पहिला बनेको हुनुपर्छ,’ रत्नविज्ञ डाक्टर गामिनी जोइसाले भने ।

ती व्यापारीले सुरक्षा जोखिम हुनसक्ने भन्दै आफ्नो पूरा नाम र ठेगाना बताउन नचाहेको बीबीसीले जनाएको छ । यो नीलम एक वर्ष पहिले नै भेटाएको हो । नीलमको यो विशाल ढिक्का भेटाएपछि यसलाई सफा गर्न र यसमा रहेका खराब तत्वहरु निकाल्न एक वर्ष समय लागेको बताइएको छ ।

यो निकै उच्च गुणस्तरको नीलम भएको अनुमान गरिएको छ । रत्न विशेषज्ञ डाक्टर जैमिनी ज्योसाका अनुसार यो नीलम ४० करोड वर्ष पहिले बनेको हुनसक्ने बताउनुभएको छ । श्रीलंका नीलम, पन्ना लगायत अन्य बहुमूल्य रत्न निर्यात गर्ने संसारमै प्रमुख देश हो ।

By admin